Hauptmenü:
Zeedel vo dr Lumpazi-Clique Alti Garde syt 1971
Akademisch-,pädagogisch-, professionelli Fiffi-Universitäts-Biss-, Fräss-, Brunz- und Schissschuel
Wotsch e Kampfhund oder e Daggel
Bruuchschen als Blinde oder fir uff dr Waggel
Bruuchsch e Hofhund oder aine zum schmuuse
Aine fir dinne oder aine fir uuse
Fir uff d Bäärge oder ins Daal
Me het jo hitte aigedlig d Waal
Will jeede Fluumer egal wie baanal
Muess in d Schuel, es isch fatal
Do will sich Aine profiliere
E Aigenutz kaa dermit verdiene
Unseri Regierig duet maischtens schlooffe
Iberaimol maint Aine vo dääne Doofe
S’isch widder Zyt,emool s Volgg z’schilkaniere
Mir losse alli Hind jetzt studiere
Mit sitz,blatz und pfui kunnsch hit nimme duure
Hind mien au kenne änglisch schnuure
Bisch achzig und bsoorgsch e Hund
Bisch grangg oder bisch gsund
Bisch gscheit oder bisch dumm
Raifflisch grad oder grumm
S’isch glyych, kasch di nid weere
D’Hundeerzieig muesch go leere
Mit Pinsacher, Baschter oder dobermaa
S’isch schisse glyych, s’ kemme alli draa
Unseri Maining hesch welle wisse
Mir finde das alles aarg beschisse
Mir dien uns frooge und lut dängge
Muesch d Lyt dressiere und rächt längge
D’Hind sin die Gscheite, das wisse mir akuurat
Vom Gsetz wird allewyl nur gschnuurt,d Hind wääre baraad
Wo und wär und was isch jetzt mit dere schuelk
Liebi Regierig,lipfet äntlig s Fiidle vom Stuel
Dr Zeedel vo D Luftschnapperli syt anne 1983 Fasnacht 2009
Uffbasse, zueloose und scheen graad sitze uff em Stuel,
esoo haissts jetzt in dr erschte Basler Hundehalter-Schuel.
Ooni Ussbildig bisch hit am Haag,egall ob Mensch oder Hund,
s wytere Lääbe und d Karriere lauft denn aifach nimm rund.
Scho bi dr erschte Glausuur denn aber en Abschiffer layder,
denn dr Schäfer Zito kennt nid emool s wort „Beutelschneider“.
No schlimmer – dr Bärry hänn si drbyy verwitscht bym spigge,
nur well d Puudeldame Daisy grätscht het, die doofi Zigge.
Drfiir im Muusiggunterricht singe si denn scheen wie ne Stärn,
em Hansheini Kaufmaa si ..“ Fäldbärgstross, i ha Di gärn“ .
S Nywoo isch hooch und bald wänn denn d Leerer, die glatte,
em Fiffy sy Entschayd, ob Fachrichtig Franzi oder Mathe.
Au die frächschte Hind mit de greeschte Gälle,
derfe im Unterricht nur uff Haudeutsch bälle.
Me gseht kurrligi Modäll, zem Byspiil dr Waldi unser daggeli,
wäg de kurze Bai,am Buuch Räschte vom letschte Gaggeli.
Ooni Brille muess dr Pluto, die prächtigi Dogge,
halt immer z vorderscht im Schuelzimmer hogge.
„ Das Obligatorium isch neetig“ – sayt dr Briefträger Mayer,
denn gumpe mir die scharfe Sieche nimm an d Aier!
Am Schluss vo dr Ussbildig wird e Talaar umme ranze bunde,
was es denn allerdings au nid eifacher macht bym pfunde.